Lëvizja Vetëvendosje, së bashku me Partinë Guxo dhe Alternativën, vazhdoi fushatën elektorale me një takim me gra dhe vajza në sallën “1 Tetori” në Prishtinë.
Nga ky takim u premtua mbështetje për çdo vajzë dhe grua që lufton për vendin, për gjeneratat e reja, për nënat e reja, për gratë në profesione të ndryshme dhe për gratë veterane të UÇK-së.
Kandidati për kryeministër nga LVV, Albin Kurti, tha se duhet ndjekur shembulli i grave në çdo fushë, ndërsa premtoi mbështetje për fuqizimin e tyre ekonomik dhe barazinë gjinore.
“Gati gjysma e administratës publike qendrore janë gra, 63 për qind e të rekrutuarve janë gra. Në FSK kemi gjenerale madhore, e synimi ynë është që në FSK të kemi 1 mijë gra e vajza. Në polici kemi mbi 1 mijë police. I ftoj nga këtu vajzat dhe gratë të marrin pjesë për kadete të reja”, tha Kurti.
Kandidati për deputet, Hekuran Murati, premtoi mbështetje për nënat lehona, rritje të pagës minimale dhe një masë të re mbështetëse të quajtur “Super Gratë”.
“Të gjitha punët e mira që tashmë kemi nisur do t’i vazhdojmë. Pa gratë, pa gjysmën e popullsisë, nuk ka punë të mirë. Përmes masës ‘Super Gratë’ do t’i mbështesim gratë me pagën minimale 500 euro, me së paku 3 mijë euro për 6 muaj. Kemi paraparë fondin për sigurime dhe pushimin e lehonisë, ku një pjesë do ta ketë edhe babai”, tha Murati.
Mimoza Kusari-Lila, kryetare e partisë Alternativa dhe kandidate për deputete, tha se gratë, përmes pavarësimit ekonomik dhe intelektual, arrijnë kauzat për drejtësi dhe barazi.
“Ne kemi seriozisht misionin për sovranitetin dhe shtetin, ngritjen e integritetit për vajza dhe gra. Këto zgjedhje janë për sigurinë dhe mirëqenien tuaj. Këto zgjedhje duhet masovikisht të dilni dhe të votoni 118”, tha Mimoza Kusari-Lila, kandidate për deputete nga Alternativa.
Në këtë takim me gra dhe vajza u bë thirrje që në zgjedhjet e 9 shkurtit të votohen kandidatët për deputetë nga Lëvizja Vetëvendosje./rtk
