Presidenti ukrainas Volodymyr Zelenskyy paralajmëroi kundër çdo marrëveshjeje paqeje pa përfshirjen e Kievit, pasi presidenti i SHBA-së, Donald Trump, ra dakord me homologun rus Vladimir Putin për të nisur “menjëherë” negociatat që synojnë t’i japin fund luftës trevjeçare në Ukrainë, raporton Anadolu, transmeton KosovaPost.
Duke folur në Konferencën e Sigurisë në Mynih, Zelenskyy hodhi poshtë idenë e arritjes së një marrëveshjeje paqeje në këtë mbledhje.
“Një marrëveshje paqeje nuk mund të nënshkruhet në Mynih, ne kujtojmë atë që u nënshkrua këtu më parë”, tha ai, duke iu referuar Marrëveshjes së Mynihut të vitit 1938, e cila nuk arriti të pengonte Hitlerin dhe nuk parandaloi Luftën e Dytë Botërore.
Ai bëri thirrje kundër përpjekjeve për të negociuar fundin e luftës pa pjesëmarrjen e Ukrainës. “Të bësh një marrëveshje pa ne ose pa Evropën, nuk është një ide e mirë, dhe shpresoj që presidenti Donald Trump të mos e ketë këtë ide”, tha Zelenksyy.
Lideri ukrainas shprehu gjithashtu zhgënjim për dështimin e NATO-s për të pranuar Ukrainën në aleancë, pavarësisht diskutimeve prej vitesh.
“SHBA nuk na panë kurrë në NATO; ata thjesht folën për këtë. Ata me të vërtetë nuk na donin në NATO. Nuk kam dëgjuar kurrë se do të jemi në NATO, kurrë!” tha ai.
Sekretari amerikan i Mbrojtjes Pete Hegseth u tha homologëve të tij evropianë në Bruksel të mërkurën se administrata Trump e konsideron kthimin në kufijtë e Ukrainës para 2014 “një objektiv jorealist”. Ai përjashtoi gjithashtu anëtarësimin në NATO të Ukrainës.
Lideri ukrainas theksoi fuqinë ushtarake të Kievit, duke argumentuar se vendi i tij tashmë luan një rol vendimtar në sigurinë evropiane.
“Ukraina nuk është në NATO, por ne kemi një ushtri të fortë. Ne mund ta forcojmë NATO-n kudo dhe mendoj se kjo është në interesat e të dyja palëve”, tha ai.
Zelenskyy theksoi gjithashtu nevojën për një zgjerim të rëndësishëm ushtarak nëse Ukraina mbetet jashtë aleancës. “Nëse nuk anëtarësohemi në NATO, atëherë duhet të dyfishojmë përmasat e ushtrisë sonë. Ne kemi nevojë për një ushtri prej 1,5 milionë trupash nëse nuk jemi në NATO, kjo është e vetmja garanci e vërtetë e sigurisë”, shtoi ai.
