Presidenti amerikan Donald Trump ka njoftuar se aktivisti konservator dhe drejtuesi i “Turning Point USA”, Charlie Kirk, ka ndërruar jetë pasi u qëllua me armë gjatë një aktiviteti në Universitetin e Luginës së Utah-it të mërkurën.
“Kirk, i madh dhe legjendar, nuk është më mes nesh. Ai u dashurua dhe u admirua nga të gjithë, veçanërisht nga unë. Ngushëllimet tona bashkëshortes së tij Erika dhe familjes,” shkroi Trump në Truth Social, duke e vlerësuar Kirk si një figurë kyçe për fitimin e mbështetjes së votuesve të rinj në zgjedhjet presidenciale të vitit të kaluar.
Sipas autoriteteve, i dyshuari për të shtënat ende nuk është në paraburgim, ndonëse më herët universiteti kishte raportuar se policia kishte arrestuar dikë. Të shtënat u raportuan në kanalin e radios së sigurisë publike të Qarkut Utah në orën 12:26 pasdite, ku zyrtarët njoftonin se në kampusin e UVU kishte një autor aktiv të të shtënave dhe kërkonin dërgimin e njësive shtesë.
Ngjarja ndodhi gjatë ndalesës së parë të Kirk në kuadër të “American Comeback Tour”, serisë së tij të aktiviteteve të drejtpërdrejta në kolegje dhe universitete. Fotot nga vendngjarja treguan kaos, me njerëz që largoheshin me vrap pas të shtënave.
