Trajneri i Real Madridit, Carlo Ancelotti ka folur për mesfushorin gjerman, Toni Kroos, pasi ky i fundit ditë më parë njoftoi se pas Euro 2024 do tërhiqet nga futbolli në moshën 34-vjeçare.
Ancelotti tha se e respekton vendimin e Kroos, duke e quajtur atë “një nga mesfushorët më të mirë në historinë e futbollit”.
“Veteranët dhe legjendat duhet të zgjedhin fatin e tyre. Toni ka marrë vendimin e tij dhe ne duhet ta respektojmë atë… Zëvendësimi i një lojtari të atij niveli është i vështirë nëse jo i pamundur”, u shpreh ai, shkruan Marca.
Ai tutje zbuloi se kishte tentuar ta bind për të qëndruar dhe më tutje, por kishte dështuar.
“Ai është gjerman, kështu që përpjekja për ta bindur të ndryshojë mendjen e tij nuk ishte aq e lehtë… Ai ishte i bindur për vendimin që kishte marrë”, u shpreh Ancelotti.
Mesfushori Kroos ka fituar 22 trofe me Madridin që kur u bashkua në vitin 2014, duke përfshirë katër tituj të Ligës së Kampionëve dhe katër tituj të La Ligas.
