Ministrja e Jashtme gjermane, Annalena Baerbock, ka deklaruar se mund t’i kuptojë njerëzit e shteteve të Ballkanit Perëndimor për shkak se, sipas saj, ende nuk është përmbushur premtimi i para 20-vjetëve në Selanik për anëtarësim në Bashkimin Evropian.
Në takimin e sotëm me ministrat e Jashtëm të Ballkanit në kuadër të Procesit të Berlinit, ajo ka theksuar se vendet që presidenti rus Vladimir Putin i konsideron si “zona gri”, tha se Gjermania nuk i sheh shtetet e Ballkanit me këtë sy.
“Sipas mendimit tonë, anëtarësimi i shteteve të Ballkanit Perëndimor – ashtu si pranimi i Ukrainës dhe Gjeorgjisë – është një domosdoshmëri gjeopolitike. Ne nuk i shohim vendet tuaja si ‘zona gri’”.
“Ne ju shohim si partnerë. Si shokë evropianë. Dhe ne duam që ju të anëtarësoheni në BE sa më shpejt që të jetë e mundur”, ka thënë Baerbock.
Më tej, ajo ka theksuar se është një mundësi për të ecur drejt bashkëpunimit më të madh ekonomik në Ballkanin Perëndimor.
Baerbock shtoi se duhet të bëhet rruga për zbatimin e CEFTA-s.
“Sepse ne kemi mësuar nga historia e Bashkimit Evropian se komuniteti ekonomik i Evropës ishte themeli mbi të cilin u rrit komuniteti ynë politik. Prandaj ne duam të punojmë për të siguruar që rruga të jetë vendosur për zbatimin e Marrëveshjes së Tregtisë së Lirë të Evropës Qendrore (CEFTA), përpara takimit të nivelit të lartë të krerëve të shteteve dhe qeverive më 14 tetor”.
“Për gati dy vjet, ne si ministra të jashtëm kemi punuar fort për të hedhur themelet për këtë. Tani, falë angazhimit tuaj, falë të gjithë ministrave të pranishëm sot këtu dhe ekipeve të tyre që qëndrojnë pas tyre, jemi afër marrëveshjes për një plan të ri veprimi për tregun e përbashkët rajonal brenda dy javëve të ardhshme”.
“Kjo mund të zhbllokojë potencialin e pashfrytëzuar ekonomik, por gjithashtu do t’i afrojë ekonomitë tuaja me Tregun Unik Evropian. Prandaj, ne nuk duhet të kufizojmë bashkëpunimin tonë në çështjet ekonomike”, ka thënë Baerbock. /Klankosova.tv
