Ministri i Jashtëm i Shqipërisë, Ferit Hoxha, i është kundërpërgjigjur homologut të tij serb, Marko Gjuriç, lidhur me debatin për lumin Ibër dhe menaxhimin e burimeve ujore.
Pas pretendimeve të Gjuriç se Shqipëria nuk ka bazë hidrologjike për t’u përfshirë në mënyrën se si Serbia menaxhon burimet ujore brenda territorit të saj, ministri Hoxha argumenton se Tirana do reagonte në të njëtën mënyrë, sikurse ishte rasti me Kosovën, nëse Beogradit do t’i ndërpritej uji që rrjedh nëpër territorin e saj.
Përmes një postimi në rrjetin social Facebook ministri nënvizon se lumenjë duhet të mbartin ujë dhe jo kërcënime dhe se kufijtë duhet të përcaktojnë juridiksione, jo të ndajnë përgjegjësinë për paqe.
“E vlerësoj ndjenjën më të qetë përmbyllëse të mesazhit të @markodjuric , sepse pikërisht aty qëndron e ardhmja e rajonit tonë: jo në kërcënime dhe akuza, por në dialog, besim dhe bashkëpunim pragmatik. Dhe kjo na kthen aty ku filloi ky shkëmbim. #Uji . Uji është jetë. Nuk mban pasaportë, nuk lexon harta politike apo nuk ndalet për të pyetur se nga cila anë e kufirit po rrjedh. Shndërrimi i tij në një instrument ndëshkimi nuk është thjesht punë e dikujt tjetër. Pra, po, #Ibri nuk rrjedh nëpër Shqipëri. Por nëse nesër dikush kërcënon se do t’ia ndërpresë Serbisë ujin që rrjedh nëpër territorin e saj, Shqipëria do të ishte po aq e zëshme. Jo sepse ai ujë do të përfundonte disi në Shqipëri, por sepse një kërcënim i tillë do të helmonte bashkëjetesën paqësore të kësaj lagjeje që të gjithë ndajmë. Për këtë janë fqinjët, apo jo? Jo për të llogaritur nëse uji arrin në rubinetin e tyre para se të vendosin nëse u intereson, por për t’u kujdesur para se llogaritje të tilla të vijnë për të përcaktuar lagjen në të cilën jetojmë. Ndaj ndoshta mund ta lëmë hidrologjinë këtu dhe të biem dakord për diçka më të thjeshtë”, shkruan Hoxha.
Më tej, ai i përgjigjet edhe pretendimeve nga ana e Gjuriç për “Shqipërinë e Madhe”, duke theksuar se vendi ynë mbetet i interesuar për një Bashkim Evropian të Madh që sipas tij, përfshin edhe Kosovën edhe Serbinë, sikurse çdo vend tjetër të rajonit.
“Dhe sa i përket të gjitha gjërave “më të mëdha” të përmendura në këtë diskutim, Shqipëria mbetet e interesuar vetëm për një: një #BashkimEvropian më të Madh , që përfshin Kosovën, Serbinë, Shqipërinë dhe pjesën tjetër të rajonit tonë. Dyert dhe linjat tona telefonike janë gjithashtu të hapura, ashtu si edhe mendjet tona, kur bëhet fjalë për ndërtimin e shembujve më konkretë të asaj që shqiptarët dhe serbët mund të arrijnë së bashku. Pra, le të vazhdojmë me më shumë #Evropë , më pak mitologji dhe më shumë arsye për ta parë të kaluarën tonë përmes syve të së ardhmes, në vend që ta shohim të ardhmen tonë përmes syve të së kaluarës. Dhe, po, ujë për të gjithë. Për të pirë në paqe dhe për të ujitur, po aq paqësisht, tokat pjellore të fqinjësisë sonë të përbashkët të bukur”, deklaroi Hoxha.
