Qytetarët që planifikojnë të udhëtojnë nga Kroacia drejt Malit të Zi po përballen me pritje të gjata në pikat kufitare, për shkak të fluksit të madh të automjeteve, shkruan KosovaPost.
Ambasada e Republikës së Kosovës në Mal të Zi me anë të një postimi në Facebook njofton se është në komunikim të vazhdueshëm me autoritetet përgjegjëse në pikat kufitare Debeli Brijeg dhe Kobila, si dhe me Qendrën Koordinuese të Policisë Kufitare të Malit të Zi, për të monitoruar situatën.
Sipas autoriteteve malazeze, procedurat kufitare në anën e Malit të Zi aktualisht zgjasin rreth 30–35 minuta, ndërsa po ndërmerren masa për përshpejtimin e kalimit.
Megjithatë, në anën kroate janë krijuar kolona shumë të gjata në drejtim të pikave kufitare Karasovići–Debeli Brijeg dhe Vitaljina–Kobila, ku pritjet mund të zgjasin disa orë për shkak të fluksit të jashtëzakonshëm të automjeteve, kapaciteteve të kufizuara rrugore dhe procedurave kufitare.
Ambasada u bën thirrje qytetarëve që para nisjes të kontrollojnë gjendjen e trafikut dhe të pikave kufitare, të planifikojnë kohë shtesë për udhëtim dhe të sigurohen që të kenë ujë dhe furnizime të nevojshme, sidomos për shkak të temperaturave të larta.
Postimi i plotë:
Njoftim për qytetarët lidhur me situatën në pikat kufitare ndërmjet Kroacisë dhe Malit të Zi
Podgoricë, 2 gusht 2026
Ambasada e Republikës së Kosovës në Mal të Zi është në komunikim të vazhdueshëm me autoritetet përgjegjëse në pikat kufitare Debeli Brijeg dhe Kobila, si dhe me Qendrën Koordinuese të Policisë Kufitare të Malit të Zi, për të monitoruar situatën dhe për të informuar qytetarët.
Sipas informacioneve të marra nga autoritetet malazeze, procedurat kufitare në anën e Malit të Zi, në të dyja pikat kufitare, aktualisht zgjasin rreth 30–35 minuta.Autoritetet malazeze janë duke ndërmarrë të gjitha masat e mundshme për të përshpejtuar procedurat kufitare dhe për të lehtësuar sa më shumë qarkullimin e udhëtarëve.
Megjithatë, në drejtimin nga Kroacia për në Mal të Zi janë krijuar kolona shumë të gjata, veçanërisht në rrugët që çojnë drejt pikave kufitare Karasovići–Debeli Brijeg dhe Vitaljina–Kobila. Sipas raportimeve nga pala kroate, pritjet në territorin e Kroacisë mund të zgjasin disa orë, si pasojë e fluksit të jashtëzakonshëm të automjeteve, kapaciteteve të kufizuara rrugore dhe procedurave kufitare.
Qytetarëve që udhëtojnë nga Kroacia drejt Malit të Zi u rekomandohet të kontrollojnë gjendjen e trafikut dhe të pikave kufitare para nisjes, të planifikojnë kohë shtesë për udhëtim dhe të sigurohen që të kenë ujë dhe furnizime të nevojshme, veçanërisht për shkak të temperaturave të larta.
Ambasada do të vazhdojë të jetë në kontakt me autoritetet malazeze dhe do të informojë qytetarët për çdo ndryshim të rëndësishëm të situatës.
