Kombet e Bashkuara (OKB) kanë deklaruar se Gaza ka përjetuar një “kolaps të plotë” të infrastrukturës digjitale, duke paralizuar operacionet humanitare dhe duke ndërprerë linjat e shpëtimit emergjent për civilët, transmeton Anadolu.
Duke vizituar Zyrën për Koordinimin e Çështjeve Humanitare (OCHA), zëdhënësi i OKB-së, Farhan Haq, tha se ekziston një “kolaps i plotë i shërbimeve të internetit dhe të të dhënave që po paralizon operacionet e ndihmës në të gjithë Rripin e Gazës.
“Partnerët tanë që punojnë në telekomunikacion thonë se kjo është për shkak të dëmtimit të rrugës së fundit të kabllit me fibra që shërben për Gazën qendrore dhe jugore, e shkaktuar me shumë gjasa gjatë aktivitetit të rëndë ushtarak (izraelit)”, tha Haq.
Ai theksoi se “kjo nuk është një ndërprerje rutinë, por një dështim total i infrastrukturës digjitale të Gazës”.
Autoriteti Rregullator Palestinez i Telekomunikacionit tha se shërbimet e internetit dhe telefonisë u rrëzuan në të gjithë Rripin e Gazës pas sulmeve izraelite në infrastrukturën e telekomunikacionit.
Autoriteti tha se izolimi digjital i Gazës ishte thelluar për shkak të “shënjestrimit sistematik” të infrastrukturës së telekomunikacionit nga Izraeli, pavarësisht përpjekjeve të përsëritura për të riparuar rrugët e dëmtuara dhe alternative gjatë një periudhe të zgjatur.
Më tej, theksohet se zonat jugore dhe qendrore të territorit palestinez tani i janë bashkuar Qytetit Gaza dhe rajonit verior në një ndërprerje totale të komunikimit për të dytën ditë radhazi.
Duke hedhur poshtë thirrjet ndërkombëtare për armëpushim, ushtria izraelite ka ndjekur një ofensivë brutale kundër Gazës që nga tetori i vitit 2023, duke vrarë të paktën 55.200 palestinezë, shumica prej tyre gra dhe fëmijë. Bombardimet e pamëshirshme e kanë kthyer enklavën në të pabanueshme dhe bllokada e ndihmës ka çuar në uri midis popullatës së enklavës.
