Kosova është pranuar si anëtare e Aleancës Evropiane për Praktikën Profesionale – Arsimin Dual, duke u bërë vendi i 43-të që i bashkohet kësaj platforme, transmeton KosovaPost.
Kështu ka njoftuar ministrja në detyrë e Arsimit, Arbërie Nagavci, e cila ka thënë se pjesë e synimeve është përfshirja aktive e sektorit privat, krijimi dhe funksionimi i Këshillave Sektoriale të Shkathtësive, përmirësimin e qeverisjes së shkollave profesionale.
“Kjo përbën një arritje të jashtëzakonshme për MASHTI-n, pasi anëtarësimi lidhet drejtpërdrejt me përkushtimin tonë për të fuqizuar arsimin profesional dhe për ta afruar atë me nevojat e tregut të punës”, ka shkruar ajo.
Ajo ka thënë se përmes këtij anëtarësimi, Kosova fiton mundësinë të bashkëpunojë me shtete të tjera në forcimin e praktikave cilësore, mobilitetit të praktikantëve dhe ndërtimin e partneriteteve strategjike me kompani, organizata rinore, dhoma të tregtisë dhe institucione arsimore nga e gjithë Evropa.
