Ekskluzivisht nga oborri i Komunitetit Mysliman të Shqipërisë, myftiu i Vlorës, Ardit Hoxhllaku, është fshirë nga lista e të përshtatshmëve pasi guxoi të prekte me shifra historike mitin për Vlorën e vitit 1492. Gjithçka nisi pasi Hoxhllaku i ktheu përgjigje publike mjekes hebreje vlonjate Ana Kohen, e cila kishte prodhuar tezën se Vlora paskësh qenë 90% hebreje dhe vetëm 10% shqiptare. Me regjistrat osmanë të tahririt në dorë, ku për vitin 1506 përmenden 665 familje të krishtera dhe 97 hebraike, Hoxhllaku guxoi të demaskonte përrallat statistikore para xhematit.
Por shifrat historike ishin vetëm shkëndija. Burimet nga xhemati thonë se ky ishte faturimi i një llogarie të vjetër me kreun e KMSH-së, Bujar Spahiu. Hoxhllaku kishte dënuar hapur gjenocidin në Palestinë dhe gjatë një iftari i kishte thënë në sy kryetarit të KMSH-së të vërtetën e hidhur për heshtjen e tyre institucionale. Për ta mbështjellë masën ndëshkuese me letër celofani, nënkryetari Lauren Luli deklaroi se myftiu gjoja nuk paska pasur kohën e duhur për të punuar në Vlorë, ndërsa para xhematit pranoi se ishte hequr para kohe dhe me qëllim.
Burimet nga xhemati e lidhin shkarkimin edhe me presionet e qeverisë Rama dhe kërkesat e ambasadës izraelite, mbështetjen e protestave nga Hoxhllaku dhe fjalimet e tij në mbrojtje të Palestinës. Sipas tyre, kjo vjen në vijim të një fushate ndaj hoxhallarëve, ku kryeministri Rama dhe ministra si Taulant Balla kanë zgjedhur gjuhën e sulmit direkt, me kulmin te shpallja “non grata” e hoxhë Bekir Halimit.
Në vend të Hoxhllakut, në krye të Myftinisë së Vlorës u ul Kliton Malaj, një besnik i linjës gyleniste brenda KMSH-së dhe i Lauren Lulit, të cilit dikur i ka shërbyer edhe si truprojë në përplasjet te xhamia “Dino Hoxha”. Malaj ka drejtuar funeralin e Myftinisë së Tiranës, ndërsa bashkëshortja e tij është rekrutuar në medresenë e kryeqytetit.
Tashmë, sipas burimeve, misioni i Malajt në Vlorë është i qartë: të bëjë zap qytetin, të mos mbështesë protesta, të mos përmendë Palestinën dhe të shmangë përballjen me besimtarët. Në KMSH, me sa duket, nuk ndëshkohet mungesa e punës, por prania e ndërgjegjes.
