Kryeministri në detyrë i Republikës së Kosovës, Albin Kurti, ka deklaruar se organizimi i Lojërave Mesdhetare Prishtina 2030 është një nga projektet më të rëndësishme që vendi do të realizojë në vitet e ardhshme.
Në mbledhjen e parë të Komitetit Organizativ të Lojërave Mesdhetare, ku morën pjesë ministri i Sportit, Blerim Gashani, kryetari i Komunës së Prishtinës, Përparim Rama, si dhe përfaqësues të institucioneve dhe sportit, Kurti tha se për herë të parë Kosova do të jetë mikpritëse e një ngjarjeje sportive të kësaj përmase.
“Lojërat Mesdhetare Prishtina 2030 janë një prej projekteve më të rëndësishme që Kosova do ta realizojë në vitet e ardhshme. Për herë të parë vendi ynë do të mirëpresë një ngjarje sportive të kësaj përmase, duke sjellë së bashku sportistë, delegacione dhe partnerë nga vende të ndryshme të Mesdheut”, u shpreh Kurti.
Ai theksoi se ky organizim paraqet një mundësi të rëndësishme për të dëshmuar kapacitetet organizative të Kosovës, për të zhvilluar më tej sportin dhe infrastrukturën sportive, si dhe për ta promovuar vendin në arenën ndërkombëtare.
Kurti gjithashtu vuri theksin te rëndësia e koordinimit ndërinstitucional për realizimin e projektit.
“Prishtina 2030 është projekt i përbashkët me rëndësi shtetërore e kombëtare, i cili kërkon vizion afatgjatë. Ne nuk jemi këtu për të përfaqësuar institucionet e ndara, por për të vepruar si mekanizëm i përbashkët koordinues, ku secili institucion kontribuon me përgjegjësitë e veta drejt qëllimit të përbashkët”, deklaroi ai.
Sipas Kurtit, Qeveria e Kosovës mbetet e përkushtuar që përgatitjet për Lojërat Mesdhetare të zhvillohen mbi parimet e bashkëpunimit ndërinstitucional, transparencës, llogaridhënies dhe standardeve më të larta të menaxhimit.
