Kryeministri në detyrë i Kosovës, Albin Kurti, ka pritur në Zyrën e Kryeministrit një grup prej rreth 25 studentësh nga mërgata, me të cilët ka diskutuar për zhvillimet politike në vend, rolin e të rinjve dhe mundësitë për bashkëpunim ndërmjet institucioneve të Kosovës dhe të rinjve jashtë vendit, përcjell KosovaPost.
Përmes një postimi në Facebook, Kurti ka bërë të ditur se në mesin e studentëve ishin përfaqësues të organizatave akademike dhe profesionale nga Gjermania dhe Zvicra.
“Pata kënaqësinë të mirëpres në Zyrën e Kryeministrit një grup prej rreth 25 studentësh nga mërgata, të cilët janë të angazhuar në rrjete të ndryshme akademike dhe profesionale në shoqërinë gjermane e zvicerane. Në mesin e tyre, përfaqësues të AYO – Albanian Youth Organization e.V., DORA e.V., VaS (Vereinigung albanischer Studierender NRW e.V.) nga Gjermania si dhe Shoqatës Studenti nga Zvicra.”, ka shkruar Kurti.
“Në bashkëbisedimin tonë, diskutuam për zhvillimet politike në vend, rolin e të rinjve dhe të rejave mërgimtarë si dhe mundësitë për një bashkëpunim më të strukturuar ndërmjet institucioneve të Kosovës dhe të rinjve tanë jashtë vendit. Idetë që janë zhvilluar nga përvojat e tyre në studime dhe në angazhimet shoqërore jashtë vendit janë një potencial i rëndësishëm për progresin e vendit tonë. Detyra jonë është të krijojmë kushtet dhe mundësitë që ata të kontribuojnë e të bashkëpunojnë për ta ndërtuar të ardhmen e tyre në Kosovë.”, shtoi ai.
