Kryeministri në detyrë i Kosovës, Albin Kurti ka thënë se faktori ndërkombëtarë duhet të ushtrojë trysini ndaj Serbisë për zbatimin e Deklaratës për të Zhdukurit me Dhunë, të dakorduar më 2 maj 2023 në Bruksel.
Ai ka thënë se arrestimi nga Serbia i shtetasve të saj nën akuzat për spiunim të cilët kanë dhënë dëshmi në institucionet e Kosovës për krime lufte është dëshmi se trysnia është e domosdoshme nëse duan të zbardhet e vërteta dhe të arrihet drejtësia.
“Arrestimi i fundit nga Serbia i shtetasve të saj nën akuzat për spiunim, e të cilët kanë dëshmuar tek institucionet ndërkombëtare për krimet e luftës në Kosovë, është dëshmi se trysnia ndërkombëtare është e domosdoshme nëse vërtetë duan që të zbardhet e vërteta dhe të arrihet drejtësia. Këto veprime dëshmojnë se ky shtet jo që nuk është i interesuar për të vërtetën, drejtësinë e paqen, por përkundrazi e ndalon dhe burgos secilin që mendon në atë drejtim”, ka thënë Kurti të shtunën pas vizitës që ka bërë në Kalludër të Zubin Potokut ku po kryhen gërmime në lokacionin ku dyshohet për varrezë masive.
