Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka bërë të ditur se ka nisur procesi për rishikimin e Udhëzimit Administrativ (MTI) Nr. 01/2018 për Ndarjen e Mjeteve Financiare nga Kategoria Ekonomike e Subvencioneve dhe Transfereve.
Kusari-Lila ka njoftuar se sot është zhvilluar takimi i parë i Grupit Punues për rishikimin e këtij udhëzimi, ndërsa ka thënë se synimi është që drafti të finalizohet brenda muajit shtator.
“Ky proces synon të riformësojë qasjen e Ministrisë ndaj subvencioneve dhe granteve, në mënyrë që ato të shërbejnë më mirë për mobilizimin e kapitalit privat dhe nxitjen e investimeve me ndikim në ekonomi”, ka deklaruar Kusari-Lila.
Në takim ka marrë pjesë edhe ministri i Financave, Hekuran Murati, i cili, sipas ministres në detyrë, ka ndarë pikëpamjet e tij me anëtarët e Grupit Punues dhe ka prezantuar përpjekjet për avancimin e kornizës ligjore dhe përmirësimin e menaxhimit të kësaj kategorie buxhetore përmes Ligjit të ri për Menaxhimin e Financave Publike.
Gjatë takimit është diskutuar për lidhjen e skemave të granteve me strategjitë e industrisë dhe tregtisë, si dhe për thjeshtimin dhe automatizimin e procesit të aplikimit.
Kusari-Lila ka bërë të ditur se pjesë e diskutimeve ka qenë edhe përdorimi i “kritereve objektive dhe inteligjencës artificiale në vlerësim”, si dhe përfshirja e Fondit Kosovar për Garanci Kreditore dhe bankave komerciale.
Sipas saj, qëllimi është që mbështetja publike të orientohet drejt investimeve që “rrisin kapacitetet prodhuese, punësimin dhe eksportet”.
Në Grupin Punues janë përfshirë përfaqësues nga Zyra e Kryeministrit, Ministria e Financave, Fondi Kosovar për Garanci Kreditore, Agjencia për Parandalimin e Korrupsionit, si dhe përfaqësues të organizatave të shoqërisë civile dhe shoqatave të bizneseve.
“Puna do të intensifikohet gjatë javëve në vijim, me synim finalizimin e draftit brenda muajit shtator dhe vendosjen e themeleve për një qasje të re dhe më efikase për mbështetjen e bizneseve”, ka thënë Kusari-Lila.
