Kryeministri i vendit, Albin Kurti, me tu kthyer nga vizita në Rumani, bëri homazhe në Kompleksin Memorial të Martirëve në Polac, ndërsa shprehet se kujtimi i dëshmorëve nuk është vetëm obligim moral, por edhe instituciona, shkruan Kosova Post.
Kujton e nderon të rënët për liri, por thekson se duke kujtuar dëshmorët dhe viktimat nuk ndalemi as në betejën për drejtësi.
“Kujtimi i tyre na udhëzon e frymëzon për të ardhmen, për të ndërtuar një shoqëri më të drejtë dhe më të mirë për të gjithë”, u shpreh kryeministri Kurti.
Shefi i ekzekutivit pas, homazheve në Kompleksin e Martirëve, vizitoi edhe familjen e zonjës Nurije Kabashi të cilës forcat serbe i vranë babain, dy vllezër si dhe vajzën e axhës.
Postimi i plotë i Kryeministrit Kurtit në Facebook:
Pas aterimit në aeroportin “Adem Jashari”, u nisa për në Polac, për të shprehur nderimin më të thellë ndaj martirëve dhe dëshmorëve të rënë për liri.
Pas homazheve në Kompleksin Memorial të martirëve në Polac, vizituam familjen e zonjës Nurije Kabashi Vojvoda, në Lagjen 3 të Skënderaj.
Më 7 prill 1999, forcat e armatosura të Serbisë, zonjës Nurije ia kanë vrarë të atin, Emin Kabashi 59 vjeç, dhe dy vëllëzërit, Islamin, 21 vjeç dhe Nehatin, 17 vjeç. Po ashtu, Nurijes ia kanë vrarë pak ditë më herët, më 4 prill 1999, edhe vajzën e axhës, Kumrije Kabashi, 24 vjeçare. Një ditë para se të mbushte 25 vjet.
25 vite pas, ne ishim në Polac për të kujtuar sakrificat për liri dhe betejën e vazhdueshme për drejtësi.
Përkujtimi i viktimave dhe dëshmorëve nuk është vetëm obligim moral, por edhe institucional, që të mos lejojmë kurrë që e vërteta të zbehet në harresë.
Kujtimi i tyre na udhëzon e frymëzon për të ardhmen, për të ndërtuar një shoqëri më të drejtë dhe më të mirë për të gjithë.
Lavdi për ata që dhanë jetën e tyre për çlirim e liri!
