Komuna e Drenasit, e cila udhëheqet nga kryetari Ramiz Lladrovci, është detyruar të anulojë njoftimin për kontratë për projektin dyvjeçar “Ndërtimi i fushave sportive në Komoran, Korreticë e Epërme dhe Arllat”, pasi Organi Shqyrtues i Prokurimit (OSHP) ka konstatuar se një pjesë e kritereve të vendosura në dosjen e tenderit janë në kundërshtim me parimet e Ligjit për Prokurim Publik, shkruan Kujdestari.info.
Paneli Shqyrtues ka aprovuar pjesërisht ankesën e operatorit ekonomik “Treing SH.P.K.”, ka anuluar njoftimin për kontratë dhe ka obliguar komunën që të përmirësojë dosjen e tenderit, të largojë mangësitë e konstatuara dhe të zgjasë afatin për dorëzimin e ofertave. (VENDIMI)
Sipas vendimit të Panelit, problemi kryesor qëndron te kriteret kualifikuese dhe kërkesat teknike të vendosura nga autoriteti kontraktues, të cilat nuk janë arsyetuar mjaftueshëm dhe mund të kufizojnë konkurrencën ndërmjet operatorëve ekonomikë. Paneli ka mbështetur gjetjet e ekspertit shqyrtues, i cili ka vlerësuar se disa kërkesa nuk janë proporcionale me natyrën dhe kompleksitetin e projektit.
Në mënyrë të veçantë, eksperti dhe Paneli kanë ngritur dilema për kërkesën që operatorët ekonomikë të kenë një Teknik të Ndërtimtarisë- drejtimi Hidro me së paku 10 vjet përvojë pune, duke vlerësuar se Komuna nuk ka dhënë arsyetim të mjaftueshëm pse një përvojë kaq e gjatë është e domosdoshme për realizimin e projektit. Sipas OSHP-së, kjo kërkesë mund të ndikojë në kufizimin e konkurrencës.
Po ashtu, problematike janë vlerësuar edhe disa kërkesa për mekanizmin dhe pajisjet teknike. Eksperti ka konstatuar se Komuna ka ruajtur pothuajse të pandryshuara disa kërkesa që edhe më herët ishin kontestuar, pa dhënë arsyetime bindëse për domosdoshmërinë e tyre.
Mes tyre përmenden kërkesa për gjenerator me kapacitet minimal 300 KVA, kamionetë me kabinë të dyfishtë dhe vinç, pajisje për lokalizimin e instalimeve nëntokësore të rrymës, damper me kapacitet maksimal 3 ton, ekskavator me peshë maksimale 900 kilogramë, kompresor 15 bar, aparat saldimi me ftohje me ujë dhe frezë për gërmim të dheut. Sipas ekspertit, për këto pajisje nuk është dëshmuar se janë të domosdoshme për realizimin e projektit, ndërsa disa prej tyre janë vlerësuar si të paqarta, joproporcionale dhe potencialisht kufizuese për konkurrencën.
Vendimi tregon se kjo nuk është hera e parë që ky tender përballet me probleme.
Eksperti ka konstatuar se Komuna kishte bërë disa ndryshime në dosjen e tenderit pas një vendimi të mëparshëm të OSHP-së, duke korrigjuar disa kritere dhe duke larguar një pjesë të pajisjeve të kontestuara.
Megjithatë, sipas ekspertit, një numër i konsiderueshëm i kërkesave për stafin profesional, përvojën dhe pajisjet teknike kanë mbetur pothuajse të njëjta, pa u adresuar në mënyrë substanciale vërejtjet e dhëna në procedurën e parë.
Nga ana tjetër, Paneli nuk ka gjetur prova të mjaftueshme për të mbështetur pretendimin e operatorit ekonomik se kriteret janë hartuar me qëllim favorizimin e një operatori të caktuar.
Për këtë arsye, kjo pjesë e ankesës është refuzuar si e pabazuar, ndërsa janë pranuar vetëm pretendimet që lidhen me proporcionalitetin dhe arsyetimin e kërkesave të kontestuara.
Në përfundim, Paneli Shqyrtues ka vlerësuar se Komuna e Drenasit nuk ka vepruar në përputhje me dispozitat e Ligjit për Prokurim Publik dhe ka urdhëruar anulimin e njoftimit për kontratë. Komuna tash duhet të rishikojë dhe arsyetojë kriteret e kontestuara, t’i harmonizojë ato me parimet e proporcionalitetit dhe konkurrencës, të përmirësojë dosjen e tenderit dhe vetëm më pas të vazhdojë procedurën me zgjatjen e afatit për ofertim. /Kujdestari.info/
