Ministrja në detyrë e Mjedisit dhe Planifikimit Hapësinor, Fitore Pacolli i ka quajtur ‘të shkretë’ opozitarët, duke thënë se “nuk dinë as kur e as për çfarë protestojnë”, teksa i ka akuzuar se janë rreshtuar në linjë me Listën Serbe.
Reagimi i saj vjen pas incidentit në seancën e sotme konstituive të Kuvendit, ku deputetja e Aleancës, Time Kadrijaj e gjuajti me vezë kryeministrin në detyrë.
“Gjuajnë me vezë Albin Kurtin, pikërisht njeriun që e shtriu sovranitetin në çdo cep të Republikës dhe e çliroi veriun nga bandat e dirigjuara nga Beogradi. E sot, në vend se të mbrojnë interesin e shtetit, rreshtohen në të njëjtën linjë me Listën Serbe për të bllokuar institucionet”, ka shkruar Pacolli në Facebook.
Sipas saj, dallimi është i qartë. “Ne protestonim për të mbrojtur territorin e Kosovës e kundër Gjykatës Speciale, ndërsa ata sot protestojnë sepse po i humbin privilegjet e tyre”, ka shtuar ajo.
Sipas Pacollit sa më shumë që partitë tjera bllokojnë e bëhen bashkë kundër Albin Kurtit, aq më shumë do të bie mbështetja për ta.
“Ne vazhdojmë fuqishëm me mbi 50%, ata le të mbesin të bashkuar, gjithnjë më të vegjël. Shteti nuk ndalet. VVazhdojmë”, ka shkruar tutje Pacolli.
