Popullsia e Gazës ka rënë me 10 për qind ndërsa Izraeli ka vazhduar luftën e tij shkatërruese në enklavën palestineze, treguan sot shifrat zyrtare, transmeton Anadolu.
“Palestina, konkretisht Rripi i Gazës, po vuan një katastrofë të paparë humanitare dhe demografike për shkak të agresionit të vazhdueshëm izraelit që nga tetori i vitit 2023”, tha në një deklaratë Byroja Qendrore Palestineze e Statistikave.
Byroja tha se më shumë se 57.000 palestinezë, përfshirë 18.000 fëmijë dhe 12.000 gra, janë vrarë në sulmet izraelite, që përbën 2,4 për qind të popullsisë së përgjithshme të Gazës.
Shifrat e publikuara nga byroja treguan gjithashtu se gati 100.000 palestinezë janë larguar nga enklava që nga fillimi i luftës izraelite.
Para shpërthimit të luftës izraelite, popullsia e Gazës ishte 2.226.544 në vitin 2023, siç treguan shifrat zyrtare.
“Vlerësimet e popullsisë tregojnë se popullsia ka rënë në afërsisht 2.129.724, duke përfaqësuar një rënie prej 6 për qind krahasuar me parashikimin e vlerësimeve të mesit të vitit 2024”, tha ajo.
“Për më tepër, popullsia ka rënë në 2.114.301, një rënie prej 10 për qind nga ajo që ishte vlerësuar për mesin e vitit 2025”, thuhet më tej.
Byroja paralajmëroi për “një ndryshim themelor” dhe shtrembërim në piramidën e moshës dhe popullsisë “për shkak të shënjestrimit të qëllimshëm të grupmoshave më të reja nga ushtria izraelite, veçanërisht fëmijëve dhe të rinjve”.
Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
