Presidentja e Republikës së Kosovës, Vjosa Osmani, teksa ka kujtuar 26 vjetorin e ndërhyrjes së NATO-s në Kosovë, ajo ka thënë se 24 marsi është dita kur liria mori krahë, transmeton Kosova Post.
Në një postim në Facebook, e para e vendit tha se ishte kjo ditë kur aleatët e NATO-s u ngritën për të mbrojtur një popull që luftonte për ekzistencën e tij, duke u përballur me regjimin gjenocidal të Serbisë.
Ajo kujtoi sakrificat dhe luftën çlirimtare, nga e cila lindi Kosova e lirë.
“Nga flaka e sakrificës dhe lufta çlirimtare, lindi Kosova e lirë! 26 vjet më pas, Kosova ecën krenare, sovrane dhe e palëkundur drejt të ardhmes më të ndritur”, tha Osmani.
Presidentja Osmani nderoi të gjithë ata që dhanë jetën për lirinë e Kosovës dhe shprehu falënderimet për aleatët ndërkombëtarë, të cilët ndihmuan në realizimin e kauzës për një Kosovë të lirë, të pavarur dhe sovrane.
“Lavdi dhe nderim për të gjithë ata që sakrifikuan për lirinë e vendit!”, u shpreh presidentja.
