Presidenti rus Vladimir Putin duhet të ulet për bisedime paqeje mbi Ukrainën, tha të enjten shefja e BE-së, Ursula von der Leyen, pas telefonatave me udhëheqësin amerikan Donald Trump dhe Volodymyr Zelensky të Ukrainës.
Kërkesa e Von der Leyen vjen ndërsa Kremlini vazhdon të pengojë përpjekjet e Trump për të vendosur bisedime të drejtpërdrejta midis Putinit dhe Zelenskyt për t’i dhënë fund pushtimit rus të Ukrainës.
“Sapo fola me presidentin Zelensky, pastaj me presidentin Trump, pas sulmit masiv ndaj Kievit i cili goditi edhe zyrat tona të BE-së. Putini duhet të ulet në tryezën e negociatave”, shkroi shefja e Komisionit Evropian von der Leyen në X.
“Ne duhet të sigurojmë një paqe të drejtë dhe të qëndrueshme për Ukrainën me garanci të forta dhe të besueshme sigurie që do ta shndërrojnë vendin ‘tejet të fortifikuar’”, shtoi ajo.
Ndërkohë, Moska nisi një nga bombardimet e saj më të mëdha brenda natës të konfliktit në Ukrainë, duke vrarë të paktën 17 persona në Kiev dhe duke dëmtuar misionin diplomatik të Bashkimit Evropian.
Si pjesë e përpjekjeve për paqe të udhëhequra nga SHBA-të, fuqitë perëndimore po diskutojnë aktualisht edhe se si të garantojnë sigurinë e Ukrainës nëse ndonjë marrëveshje armëpushimi hyn në fuqi.
Trump ka lënë të kuptohet se Shtetet e Bashkuara mund të luajnë një rol në mbështetjen e çdo plani paqeruajtës evropian, por nuk do të vendosin ushtarë amerikanë në Ukrainë.
Von der Leyen shkroi se “Evropa do të luajë plotësisht rolin e saj”, duke theksuar një program të ri të madh të BE-së të hartuar për të ndihmuar në financimin e armëve për Ukrainën.
