Përfaqësuesi i Lartë për Politikë të Jashtme i Bashkimit Evropian, Josep Borrell të enjten ka thënë se së shpejti do t’i ftojë në një takim në Bruksel kryeministrin e Kosovës, Albin Kurti dhe presidentin serb, Aleksandar Vuçiq.
E për këtë, zëdhënësi i Qeverisë, Përparim Kryeziu për Teve1.info ka thënë se janë në kontakt të vazhdueshëm me BE-në për caktimin e takimit të radhës.
Sipas tij, Kurti është i gatshëm për takime të nivelit të lartë politik.
“Jemi në kontakt të vazhdueshëm me Bashkimin Evropian për caktimin e takimit të radhës. Gatishmërinë për takime të nivelin të lartë politik e kemi shprehur vazhdimisht edhe publikisht”, tha ai.
Për datë të takimit tha se “do të ju mbajmë të informuar me kohë”.
Ndërkaq, presidenti i Serbisë, Aleksandar Vuçiq në po të njëjtën ditë që Borrelli paralajmëroi takim në Bruksel mes Kosovës dhe Serbisë, tha se mund të shkojë vetëm si turist, derisa të krijohet Asociacioni i Komunave me Shumicë Serbe.
“Ata mund të shtyjnë çfarë të duan, por duhet të më thonë se çfarë nënkupton kjo. Unë kurrë nuk i jam shmangur të flas për asgjë, për asnjë çështje. Por, para kësaj Asociacioni i Komunave Serbe”, ka theksuar Vuçiq.
