Në sheshin e kryeqytetit gjatë së enjtes pati më pak qenë endacakë.
Ata u larguan nga organet e Komunës së Prishtinës, për t’u dërguar në një strehimore të licencuar për trajtimin e tyre.
Sipas kryetarit të Prishtinës, Përparim Rama, ky aksion do të vazhdojë derisa të mos mbetet asnjë qen endacak rrugëve të kryeqytetit.
Krahas kësaj, Rama tha se është marrë vendimi që të subvencionohet me 50 euro në muaj secili qytetarë që strehon një qen endacak.
“Ndarja e kësaj shume është e domosdoshme për të strehuar qentë në mënyrë humane dhe për të mbuluar shpenzimet e ushqimit dhe kushtet higjienike. Ndarja e kësaj shume është e domosdoshme për të krijuar siguri tek qytetarët tanë”, tha Rama.
Mirëpo ky vendim po kritikohet nga qytetarët.
“Komuna duhet me pasë një projekt të vetin, mos me angazhu popullin por me pasë një organizatë speciale që e bën kastrimin e tyre edhe kujdeset për ta e jo me i lanë rrugëve, se ata tërbohen, është rrezik për fëmijë, qe besa edhe për të rritur kur shkojnë grupe”, tha një qytetar.
“Kurrë hiç, kurrë, s’ja vlen. Këta duhet me i trajtu shteti, komuna sidomos e jo me i lanë kështu duke i sulmuar fëmijët, duke i traumatizuar, kjo është e pashpjegueshme pse i tolerojnë kështu”, u shpreh një tjetër qytetarë.
Ndërsa të tjerët shprehen se kjo shumë nuk mjafton për t’u kujdesur për qentë endacakë.
“Me i adoptu, me i majtë tjetër është çka e mban për qejf, po për me u kujdesë për ta qysh duhet me i majtë me ushqim t’vetin, pak janë 50, me kon bile 100”, deklaroi një qytetar.
“Me gjithë kënaqësi po qe se kishim pasë mundësi. Se për një qen endacak duhet me pasë edhe kushte edhe mundësi edhe financa edhe të gjitha”, tha një tjetër.
Vendimi për strehimin e qenve endacak u mor, tre ditë pas kafshimit në fytyrë të një fëmije dyvjeçar nga një qen endacak në sheshin e kryeqytetit fundjavën e kaluar.
