Me vetëm pak ditë deri në seancën konstituive të Kuvendit më 6 gusht, pritjet për arritjen e një marrëveshjeje politike për formimin e institucioneve të reja janë shtuar. Kryeministri në detyrë, Albin Kurti, ka paralajmëruar se kjo javë mund të sjellë zhvillime konkrete në bisedimet me Lidhjen Demokratike të Kosovës, ndërsa ka theksuar se përpjekjet për sigurimin e shumicës parlamentare do të vazhdojnë deri në momentin e fundit.
Kryeministri në detyrë, Albin Kurti, ka bërë të ditur se gjatë kësaj jave mund të ketë zhvillime konkrete në bisedimet me LDK-në për formimin e institucioneve të reja. Ai ka theksuar se partitë duhet të jenë të përgatitura për seancën konstituive të Kuvendit.
“Do të përpiqemi që t’i shfrytëzojmë këto ditë, në mënyrë që të jemi sa më të përgatitur kur fillon seanca për konstituimin e institucioneve të legjislaturës së 11-të. Mirëpo nuk mund ta parashikojmë ende rezultatin, nuk do të mungojnë përpjekjet. Ekziston edhe interesimi, edhe vullneti, edhe gatishmëria, por në javën e ardhshme marrim vesh gjithçka”, ka deklaruar ditë më parë Kurti.
Ndërkaq, kryetari i LDK-së, Lumir Abdixhiku, ka hequr pezullimin e bisedimeve, duke u shprehur i gatshëm për vazhdimin e tyre me qëllim të formimit të institucioneve të reja pas zgjedhjeve të qershorit.
Në anën tjetër, Partia Demokratike e Kosovës (PDK) dhe Aleanca kanë bërë të ditura qëndrimet e tyre lidhur me krijimin e institucioneve të reja, duke ritheksuar pozicionet që kanë mbajtur edhe pas zgjedhjeve.
Seanca konstituive e Kuvendit është caktuar për 6 gusht. Në këtë seancë, deputetët fillimisht do të bëjnë betimin, ndërsa më pas duhet të zgjidhen kryetari i Kuvendit dhe pesë nënkryetarët.
Vetëm pas konstituimit të Kuvendit mund të vazhdojnë procedurat kushtetuese për propozimin e mandatarit dhe formimin e Qeverisë së re.
Për këtë arsye, ditët para seancës konsiderohen vendimtare për përpjekjet e partive për të siguruar shumicën parlamentare dhe për të shmangur zgjatjen e bllokadës institucionale.
