Një valë e fuqishme e të nxehtit ka përfshirë Evropën, duke ngritur temperaturat mbi 40 gradë Celsius në disa shtete dhe duke shkaktuar probleme në shëndetësi, energji, transport dhe turizëm.
Sipas Euronews, Italia ka vendosur të gjitha qytetet kryesore nën nivelin më të lartë të alarmit, Austria ka regjistruar temperaturën më të lartë ndonjëherë, ndërsa Franca dhe vendet e Ballkanit po përballen me zjarre dhe thatësirë.
Shkencëtarët dhe zyrtarët kanë paralajmëruar se ngjarje të tilla po bëhen më të shpeshta dhe më intensive për shkak të ngrohjes së klimës.
Italia vendos 27 qytete në alarm të kuq
Ministria e Shëndetësisë e Italisë vendosi të enjten në alarm të kuq të gjitha 27 qytetet e monitoruara nga sistemi kombëtar i mbikëqyrjes së të nxehtit.
Kjo është hera e parë gjatë këtij viti që të gjitha qytetet vendosen njëkohësisht në nivelin më të lartë të paralajmërimit.
Alarmi shtrihet nga Trieste deri në Palermo dhe paraqet rrezik për të gjithë popullsinë, jo vetëm për të moshuarit dhe personat me sëmundje kronike.
Autoritetet u kërkuan banorëve dhe turistëve të shmangin ekspozimin në diell gjatë orëve më të nxehta, të qëndrojnë brenda dhe të konsumojnë ujë.
Për shkak të vapës, janë zgjatur edhe oraret e hapjes në mbrëmje në Kolose dhe Panteon, ndërsa në hyrje të Koloseut janë vendosur pajisje freskuese dhe pika shtesë mjekësore.
Austria thyen rekordin kombëtar të temperaturës
Në Austri, temperatura arriti të mërkurën në 41.2 gradë Celsius në fshatin Bad Deutsch-Altenburg, pranë kufirit me Sllovakinë.
Sipas GeoSphere Austria, kjo është temperatura më e lartë e regjistruar ndonjëherë në vend.
Austria po përballet edhe me thatësirë të rëndë. Reshjet nga 1 janari deri më 30 qershor ishin 27 për qind më të ulëta se mesatarja afatgjatë.
Klimatologu Alexander Orlik tha se disa pjesë të vendit nuk kishin përjetuar kushte kaq të thata që nga viti 1885.
Hungaria ul prodhimin e energjisë
Në Hungari, thatësira dhe nivelet rekord të ulëta të ujit në lumin Danub kanë ndikuar në centralin e vetëm bërthamor të vendit, i cili përdor ujin e lumit për ftohjen e reaktorëve.
Centrali Paks ka ulur prodhimin në rreth 10 për qind të kapacitetit normal.
Autoritetet u kanë kërkuar industrive dhe familjeve të zvogëlojnë konsumin e energjisë elektrike, veçanërisht nga ora 17:00 deri në 22:00.
Trenave të mallrave u është ndaluar qarkullimi gjatë këtyre orëve, ndërsa ndriçimi dekorativ në Budapest është fikur.
Budapesti regjistroi gjithashtu natën më të ngrohtë, me temperatura që ranë vetëm në 28 gradë Celsius.
Gjermania shqetësohet për nivelin e lumenjve
Në Gjermani, nivelet e ujit në lumin Rin dhe në lumenj të tjerë vazhduan të bien, duke shkaktuar shqetësime për transportin dhe industrinë.
Ministri i Transportit, Steffen Bilger, paralajmëroi se niveli i ulët i ujit paraqet sfida për transportin lumor, industrinë dhe zinxhirin e logjistikës.
Organizata mjedisore BUND kërkoi që autoritetet të punojnë për t’i bërë lumenjtë më të qëndrueshëm ndaj ndryshimeve klimatike.
Franca mbetet në alarm për zjarret
Në juglindje të Francës, zjarrfikësit vazhduan angazhimin në rajonin Var, ku një zjarr i madh nuk po përhapej më, por mund të riaktivizohej.
Zjarri, i cili nisi më 20 korrik, ka djegur më shumë se 60 kilometra katrorë dhe është zjarri më i madh i regjistruar në rajon gjatë dekadave të fundit.
Autoritetet paralajmëruan se erërat e fuqishme dhe kushtet e thata e mbajnë juglindjen e Francës në rrezik të lartë për zjarre të tjera.
Ballkani përballet me zjarre dhe thatësirë
Vala e të nxehtit arriti kulmin në Ballkan të enjten, me temperatura pranë 40 gradëve Celsius.
