Presidenti i Serbisë, Aleksandar Vuçiq, ka reaguar pas takimit të shefit të Shtabit të Përgjithshëm të Ushtrisë së Serbisë, Milan Mojsiloviq, me komandantin e KFOR-it, gjeneralmajorin Özkan Ulutaş, lidhur me procesin e paralajmëruar të tërheqjes graduale të pjesëtarëve të KFOR-it nga ura kryesore mbi lumin Ibër në Mitrovicë.
Vuçiq tha se biseda mes Mojsiloviqit dhe Ulutaş ishte “ndoshta më e keqja deri tani”, duke kundërshtuar qëndrimin e komandantit të KFOR-it se procesi i ndryshimit të prezencës në urën mbi Ibër është pjesë e një procesi gradual të optimizimit të misionit.
“Komandanti i KFOR-it i tha Mojsiloviqit se nuk ka problem dhe se Policia e Kosovës do t’i kryejë të gjitha këto së bashku me KFOR-in”, deklaroi Vuçiq, raporton N1.
Ai e kritikoi ashpër këtë qëndrim, duke thënë se tashmë “e dinë me kë kanë punë”.
“Vërtet, nuk ka problem? Mirë atëherë, tani e shohim pse i keni bërë të gjitha ato në vitin 1999. I kuptojmë të gjitha. Nga ky këndvështrim, të paktën e dimë me kë kemi punë. Vetëm mos u shtirni më se jeni për ndonjë dialog, sepse nuk jeni për dialog”, tha presidenti serb.
Deklaratat e Vuçiqit vijnë pasi komandanti i KFOR-it, Özkan Ulutaş, u takua të martën në selinë e misionit në Kampin Film City me kryetarin e Listës Serbe, Zlatan Elek, i cili kishte kërkuar takimin, thuhet në një njoftim lëshuar nga paqeruajtësit e misionit KFOR.
Në takim morën pjesë edhe nënkryetari i Listës Serbe, Igor Simiq, deputetja e kësaj partie në Kuvendin e Kosovës, Jovana Radosavljeviq, si dhe kryetari i Mitrovicës së Veriut, Milan Radojeviq.
Sipas KFOR-it, në takim është diskutuar për situatën e sigurisë në veri të Kosovës dhe procesin e paralajmëruar për optimizimin e prezencës së misionit.
Ulutaş ka theksuar se procesi i optimizimit ka nisur si rezultat i përmirësimit të situatës së sigurisë në Kosovë dhe se do të zbatohet gradualisht, në bazë të kushteve në terren.
Ai ka paralajmëruar se procesi mund të rikthehet nëse zhvillimet e ardhshme ndikojnë në sigurinë afatgjatë në Kosovë apo në stabilitetin rajonal.
“KFOR-i do të mbetet plotësisht i pajisur dhe i pozicionuar për t’iu përgjigjur çdo zhvillimi relevant”, ka deklaruar Ulutaş, duke theksuar se misioni do të vazhdojë të veprojë në përputhje me mandatin e tij të përcaktuar nga Kombet e Bashkuara.
KFOR-i ka bërë të ditur se kalimi gradual i prezencës nga ura kryesore mbi Ibër është ende në fazën fillestare. Pas përfundimit të këtij procesi, sipas misionit të NATO-s, do të ruhet një prezencë e fuqishme në Mitrovicën e Veriut dhe në pjesën veriore të Kosovës, në interes të të gjitha komuniteteve.
KFOR-i ka ritheksuar gjithashtu se mbetet reaguesi i parë për sigurinë e Manastirit të Deçanit dhe se është i përkushtuar për garantimin e sigurisë së tij.
Duke folur për dialogun Kosovë-Serbi, Vuçiq kritikoi edhe Bashkimin Evropian, duke pretenduar se pala kosovare nuk i ka përmbushur obligimet e saj nga Marrëveshja e Brukselit.
“Po të ishit për dialog, shqiptarët do t’i kishin përmbushur obligimet e tyre nga Marrëveshja e Brukselit, ndërsa kishin vetëm një”, tha ai.
Vuçiq komentoi edhe reagimin e zëdhënëses së Komisionit Evropian lidhur me paralajmërimin e tij për ndryshimin e rrjedhës së lumit Ibër. Sipas tij, ndryshimi i rrjedhës së Ibrit është ende larg realizimit dhe fillimisht duhet të krijohet një grup punues dhe të angazhohen ekspertë.
RTK ishte mediumi i parë që raportoi për procesin e largimit gradual të pjesëtarëve të KFOR-it nga ura kryesore mbi Ibër dhe kalimin e përgjegjësisë për sigurinë e saj te Policia e Kosovës.
KFOR-i, ndërkaq, ka theksuar se vazhdon ta zbatojë mandatin e tij bazuar në Rezolutën 1244 të Këshillit të Sigurimit të OKB-së, duke kontribuar në një mjedis të sigurt për të gjithë qytetarët dhe në garantimin e lirisë së lëvizjes.
Misioni ka thënë se këtë mandat e zbaton në mënyrë të paanshme dhe në koordinim me Policinë e Kosovës dhe EULEX-in, secili në kuadër të përgjegjësive të veta.
