Zyrtarët doganorë të Doganës së Kosovës kanë parandaluar një rast të mosdeklarimit të mjeteve monetare në pikën e kalimit kufitar Vërmicë.
Sipas Doganës, drejtuesi i automjetit kishte deklaruar fillimisht se nuk posedonte mallra apo mjete monetare për deklarim.
“Bazuar në analizën e rrezikut, është realizuar një kontroll i përbashkët nga zyrtarët e Doganës së Kosovës dhe Policisë së Kosovës. Gjatë kontrollit janë zbuluar mjete monetare të fshehura në dollapin e kamionit, si dhe një pjesë e tyre në jastëkun e shoferit.”
Autoritetet njoftuan se janë gjetur gjithsej 30 mijë euro në kartëmonedha prej 20, 50, 100 dhe 200 euro, ndërsa mjetet monetare janë ndaluar përkohësisht dhe rasti është proceduar sipas legjislacionit në fuqi.
Dogana rikujtoi se çdo person që transporton 10 mijë euro ose më shumë ka detyrim ligjor t’i deklarojë ato pranë autoriteteve doganore.
