Saga e gjatë rreth Nico Williams më në fund mori fund javën e kaluar, pasi lojtari vendosi të qëndrojë te Athletic Bilbao, duke i mbyllur derën Barcelonës edhe këtë verë.
Për dy afate kalimtare me radhë, Barça kishte shprehur interes për sulmuesin e krahut të majtë, por sërish rezultati ishte i njëjtë: Nico do të qëndrojë në Bilbao deri në vitin 2035.
Presidenti Joan Laporta ishte i vetëdijshëm për vështirësitë e marrëveshjes, por u përpoq deri në fund për ta realizuar transferimin. Megjithatë, lojtari vendosi të mos largohej nga klubi
Pas këtij zhgënjimi, drejtuesit e Barcelonës po kërkojnë alternativa të reja që mund të ndezin entuziazmin e tifozëve në këtë merkato verore.
Emrat më të përmendur janë Marcus Rashford dhe Luis Diaz me këtë të fundit që është lidhur me një kalim te Bayern Munich, por Barça ka në shënjestër edhe një tjetër emër interesant nga Bundesliga.
Bëhet fjalë për Xavi Simons, talenti holandez që dikur ishte pjesë e akademisë së Barcelonës. Ai tani luan si sulmues i krahut apo edhe si ‘9 fals’, pozicione që Barcelona synon t’i forcojë.
Megjithatë, çmimi i lartë prej rreth 80 milionë euro mbetet pengesa kryesore për transferimin e tij, pasi situata financiare e Barcelonës nuk lejon shpenzime të mëdha.
Gjithsesi Simons mbetet një emër në listën e Barcelonës dhe mediumi katalunas Sport raporton se Barcelona do të tentojë të gjejë një mënyrë për transferimin e holandezit në Camp Nou, duke marrë parasysh edhe raportet te mira me RB Leipzig.
