Delegacioni i organizatës “Albanians for America” ka zhvilluar një takim me të Ngarkuarën me Punë të Shteteve të Bashkuara të Amerikës në Kosovë, Anu Prattipati, ku u diskutua për forcimin e partneritetit ndërmjet Kosovës dhe SHBA-së, si dhe për thellimin e bashkëpunimit në disa sektorë strategjikë.
Delegacioni i AFA-së përbëhej nga Gino Mulliqi, Gëzim Rushiti dhe Janinë Memeti, të cilët, së bashku me përfaqësuesen amerikane, riafirmuan rëndësinë e marrëdhënieve të ngushta ndërmjet dy vendeve dhe nevojën për avancimin e bashkëpunimit në fusha me interes të përbashkët.
Gjatë takimit, vëmendje e veçantë iu kushtua zgjerimit të bashkëpunimit ekonomik, rritjes së investimeve amerikane në Kosovë dhe zhvillimit të sektorit të energjisë, përfshirë projektet që lidhen me gazin natyror të lëngshëm. Po ashtu, u diskutua edhe për krijimin e vendeve të reja të punës përmes investimeve strategjike.
Përfaqësuesit e AFA-së theksuan se funksionimi i institucioneve dhe qeverisja e qëndrueshme janë faktorë kyç për rritjen e besimit të investitorëve dhe për zhvillimin afatgjatë ekonomik të Kosovës.
“Forcimi i institucioneve dhe qeverisja e qëndrueshme janë thelbësore për rritjen e besimit të investitorëve dhe zhvillimin ekonomik të vendit”, theksuan përfaqësuesit e AFA-së.
Në kuadër të diskutimeve, delegacioni bëri thirrje edhe për rifillimin e Dialogut Strategjik Kosovë–SHBA, duke e cilësuar atë si një mekanizëm të rëndësishëm për koordinim dhe bashkëpunim afatgjatë në fushat e sigurisë, ekonomisë, energjisë dhe zhvillimit institucional.
Gjithashtu, u nënvizua kontributi i komunitetit shqiptaro-amerikan në forcimin e lidhjeve ndërmjet Kosovës dhe Shteteve të Bashkuara, si dhe në krijimin e mundësive të reja për investime dhe zhvillim ekonomik.
Në përfundim të takimit, delegacioni i Albanians for America shprehu mirënjohje për mbështetjen e vazhdueshme që SHBA-ja i ka dhënë Kosovës ndër vite, duke riafirmuar përkushtimin për thellimin e mëtejshëm të bashkëpunimit dypalësh.
