Ministrja e Drejtësisë, Albulena Haxhiu, ka marrë pjesë sot në Ministerialin e organizuar në Shkup, krahas përfaqësueseve të institucioneve të Bashkimit Evropian dhe vendeve të tjera të rajonit.
Në njërën prej paneleve është diskutuar edhe për sulmin terrorist të 24 shtatorit në Banjskë të Zveçanit. Ministrja Haxhiu ka vlerësuar vendet që kanë dënuar atë, teksa ka shtuar se janë prezantuar dëshmi që argumentojnë se sulmi në Banjskë është mbështetur nga Serbia, transmeton lajmi.net.
“Ministrja Haxhiu tha se një sulm i tillë, pa dyshim është sulm ndaj rendit kushtetues dhe sovranitetit të Republikës sonë, sulm ndaj paqes dhe sigurisë në rajon, e për të cilin akt, ne tashmë kemi prezantuar fakte dhe dëshmi se janë të lidhura dhe mbështetura nga fqinji ynë verior, Serbia. Ministrja Haxhiu ftoi të gjitha vendet që të rreshtohen dhe të dënojnë sulmet e tilla terroriste dhe të kontribuojnë për drejtësinë dhe paqen”, thuhet në një komunikatë.
Ajo ka shtuar se është domosdoshmëri bashkëpunimi i shteteve të rajonit për ta ruajtur paqen.
“Nevoja për bashkëpunim të ndërsjellë juridik të shteteve tona në rajon, për të ruajtur paqen, sigurinë dhe stabilitetin, është domosdoshmëri e secilit nga ne dhe se Republika e Kosovës mbetet e përkushtuar që të bashkëpunojë për ruajtjen e paqes dhe sigurisë, dhe çështjet tjera të interesit të përbashkët”, tha ndër të tjera Ministrja e Drejtësisë.
