Sirenat e sulmeve ajrore kanë rënë në Tel-Aviv mbrëmjen e së premtes, duke ngjallur frikë dhe pasiguri mes qytetarëve.
Sipas raportimeve zyrtare, Irani ka lëshuar një breshëri raketash drejt territorit izraelit, në një hakmarrje të paralajmëruar për sulmet ajrore të fundit që Izraeli kreu në objektet strategjike dhe bërthamore iraniane.
“Forcat e Mbrojtjes së Izraelit (IDF) janë në gjendje të plotë gatishmërie. I gjithë Izraeli është nën zjarr”, thuhet në një deklaratë të publikuar në rrjetin social X, ku theksohet se dhjetëra raketa janë zbuluar duke u afruar në drejtim të territorit izraelit.
Të paktën një shpërthim i largët është dëgjuar në Tel-Aviv, sipas mediave lokale, ndërsa Komanda e Frontit të Brendshëm ka urdhëruar qytetarët të zhvendosen menjëherë në strehimore. Paralajmërimi për sulm është aktiv për të gjithë vendin, çka nënvizon seriozitetin dhe shtrirjen e gjerë të kërcënimit.
Media shtetërore iraniane IRNA ka konfirmuar nisjen e sulmit, duke e cilësuar këtë si “fillimin e hakmarrjes ndaj agresioneve izraelite”. Sulmet vijnë vetëm disa orë pasi Irani raportoi shpërthime pranë kompleksit bërthamor Fordo dhe goditje të rënda ajrore në zonat e Teheranit dhe Karajit.
Televizioni izraelit Channel 13 ka raportuar se raketat pritet të godasin objektiva brenda dhjetë minutash, duke lënë pak kohë për reagim taktik.
Ndërkohë, SHBA ka rritur praninë ushtarake në rajon, duke dislokuar avionë luftarakë dhe anije luftarake për të mbrojtur instalimet dhe trupat amerikane në Lindjen e Mesme.
Tensionet janë në pikën më të nxehtë të dekadës së fundit, me komunitetin ndërkombëtar që shpreh shqetësim për përshkallëzimin e mundshëm të konfliktit në një luftë të hapur rajonale./rtk
