Departamenti Amerikan i Shtetit ka lëshuar një deklaratë ku thotë se është i njohur me vdekjen e shtetasit amerikan Saif al-Din Kamel Abdul Karim Musallat në Bregun Perëndimor, pas raportimeve për një sulm fatal nga kolonët izraelitë ndaj një palestinezo-amerikani.
Agjencia palestineze e lajmeve WAFA, duke cituar Ministrinë lokale të Shëndetësisë, njoftoi se Musallat, në të njëzetat, ka ndërruar jetë pasi është rrahur nga kolonët gjatë një sulmi në një qytet verior të Ramallahut. Sipas agjencisë Reuters, në atë sulm janë plagosur edhe dhjetë persona të tjerë.
Gazeta The Washington Post ka transmetuar një deklaratë të familjes së Musallat nga Tampa, Florida, në të cilën thuhet se ai është rrahur për vdekje nga kolonët izraelitë. “Jemi të njohur me vdekjen e një shtetasi amerikan në Bregun Perëndimor,” tha zëdhënësi i Departamentit të Shtetit.
Ushtria izraelite deklaroi se po heton incidentin në qytetin Sinjil, ku ka shpërthyer një përplasje midis palestinezëve dhe kolonëve, pasi këta të fundit u sulmuan me gurë nga palestinezët, duke shkaktuar plagosjen e disa izraelitëve.
Më vonë, Ministria Palestineze e Shëndetësisë njoftoi se edhe një i ri tjetër palestinez, Muhammad Rizq Hussein al-Shalabi, është vrarë në të njëjtin sulm të kolonëve izraelitë në qytetin Sinjil të Bregut Perëndimor. Sipas zyrtarëve palestinezë, al-Shalabi është qëlluar me armë dhe është lënë të gjakoset për orë të tëra.
Kombet e Bashkuara dhe organizata të tjera të rëndësishme për të drejtat e njeriut i konsiderojnë vendbanimet izraelite në Bregun Perëndimor si shkelje të së drejtës ndërkombëtare, pjesë e një strategjie më të gjerë për zhvendosjen e palestinezëve.
