Kryeministri në detyrë, Albin Kurti, përmes një postimi në platformën sociale ‘’X’’, është deklaruar rreth gërmimeve që po bëhen në fshatin Kalludër, në komunën e Zubin Potokut, mbi dyshimet për varrezë masive.
Kurti, në postimin e tij ka thënë se, edhe pas më shumë se një çerek shekulli pas përfundimit të luftës së viteve 1998–1999, ankthi vazhdon për familjet e 1,565 personave të zhdukur me dhunë, përfshirë mbi 100 fëmijë.
‘’Pengimi i vazhdueshëm nga Serbia i përpjekjeve për të zbardhur fatin e këtyre njerëzve të pafajshëm nuk do ta ndalë Republikën e Kosovës në kërkimin e së vërtetës dhe drejtësisë’’, ka thënë Kurti mes tjerash. Autoritetet e Republikës së Kosovës kanë nisur gërmimet në një varrezë masive në fshatin Kalludër, në komunën e Zubin Potokut. Dyshohet se në këtë varrezë ndodhen mbetjet mortore të fshehura prej kohësh të një grupi prej 23 intelektualësh nga Mitrovica – mjekë, profesorë dhe aktivistë të të drejtave të njeriut – të cilët u rrëmbyen dhe u zhdukën më 19 prill 1999. Më shumë se një çerek shekulli pas përfundimit të luftës së viteve 1998–1999, ankthi vazhdon për familjet e 1,565 personave të zhdukur me dhunë, përfshirë mbi 100 fëmijë. Pengimi i vazhdueshëm nga Serbia i përpjekjeve për të zbardhur fatin e këtyre njerëzve të pafajshëm nuk do ta ndalë Republikën e Kosovës në kërkimin e së vërtetës dhe drejtësisë. Ne mbetemi të palëkundur në përkushtimin tonë për të gjetur çdo person të zhdukur, për të zbuluar çdo varrezë të fshehur dhe për t’i vënë para përgjegjësisë ata që janë përgjegjës, në mënyrë që familjet e të zhdukurve të gjejnë më në fund një masë paqeje dhe ngushëllimi”, shkroi Albin Kurti.
