Agjencia e Ushqimit dhe Veterinarisë (AUV) ka bërë thirrje për kujdes të shtuar nga fermerët që mbajnë derra, pas shpërthimeve të konfirmuara të Mortajës Afrikane të Derrave (ASF) në disa vende të rajonit, përcjrll KosovaPost.
Sipas AUV-së, deri më tani kjo sëmundje nuk është konfirmuar në Republikën e Kosovës, por rreziku i përhapjes mbetet i lartë, ndaj fermerët janë kërkuar të zbatojnë me përpikëri masat e biosigurisë në fermat e tyre.
Në njoftim, AUV ka kërkuar kufizimin e hyrjes së personave dhe automjeteve të panevojshme në ferma, dezinfektimin e rregullt të hyrjeve, pajisjeve, automjeteve dhe këpucëve, si dhe shmangien e kontaktit të derrave shtëpiakë me derrat e egër.
Po ashtu, fermerëve u është bërë thirrje të mos përdorin mbetje ushqimore për ushqimin e derrave, të blejnë kafshë vetëm nga ferma të regjistruara me dokumentacion veterinar dhe të raportojnë menjëherë çdo rast të dyshimtë te veterineri ose zyrat rajonale të AUV-së.
AUV ka sqaruar se Mortaja Afrikane e Derrave nuk transmetohet te njerëzit dhe nuk paraqet rrezik për shëndetin e tyre, por mund të shkaktojë humbje të mëdha ekonomike në sektorin e blegtorisë për shkak të përhapjes së shpejtë tek derrat.
Agjencia ka bërë të ditur se po monitoron vazhdimisht situatën epidemiologjike dhe do të ndërmarrë masat e nevojshme për parandalimin e hyrjes dhe përhapjes së kësaj sëmundjeje në Kosovë.
