Gjermania po përgatit një valë porosish prokurimi me vlerë shumë të madhe, duke përfshirë 20 avionë luftarakë Eurofighter, deri në 3,000 automjete të blinduara Boxer dhe deri në 3,500 automjete luftarake këmbësorie Patria, thanë për Reuters dy burime të njohura me planet.
Blerjet janë pjesë e përpjekjes së kancelarit Friedrich Merz për të ndërtuar ushtrinë më të fuqishme konvencionale të Evropës, me qëllim uljen e varësisë nga një aleat gjithnjë e më i paparashikueshëm, Shtetet e Bashkuara, dhe marrjen e përgjegjësisë më të madhe për sigurinë evropiane.
Më parë këtë vit, Merz siguroi mbështetjen parlamentare të nevojshme për të përjashtuar shpenzimet e mbrojtjes nga kufijtë e borxhit të Gjermanisë të përcaktuara me kushtetutë, duke i mundësuar qeverisë së tij të financojë riorganizimin ushtarak, përcjell Telegrafi.
Buxheti i rregullt i mbrojtjes i Gjermanisë parashikohet të rritet në rreth 83 miliardë euro (95.8 miliardë dollarë) në vitin 2026, 20 miliardë më shumë se në vitin 2025.
Vetëm porosia e Eurofighter pritet të kushtojë midis 4 dhe 5 miliardë euro, thanë burimet, ndërsa automjetet Boxer – të ndërtuara nga KNDS dhe Rheinmetall – vlerësohen në 10 miliardë euro. Automjetet Patria pritet të kushtojnë afërsisht 7 miliardë euro.
Ministria e mbrojtjes po përparon gjithashtu planet për të blerë më shumë sisteme të mbrojtjes ajrore IRIS-T dhe disa qindra platforma mbrojtëse nga dronë SkyRanger, thanë burimet, duke vënë në dukje se detajet financiare për këto blerje ende nuk janë finalizuar.
Bloomberg raportoi gjithashtu mbi planet e prokurimit, megjithëse citoi disa shifra të ndryshme.
Merz është zotuar të përmbushë standardin e ri të NATO-s për të shpenzuar 3.5% të PPB-së për mbrojtje deri në vitin 2029 – shumë përpara shumicës së anëtarëve të aleancës. /
